No. 4 Sale

السلام عليكم ورحمة الله وبركاته

كل صيف وانتوا بخير .. والله يعين مفارقين أحبابهم
ماتحسون ان الصيف هالسنه غير عن كل صيف؟’ ولا بس انا اللي حسيت بهالشي
صح ان درجة الحراره سجلت ارقام قياسيه هالسنه .. بس ماشاءالله الرطوبه اخف في الليل
وشفنا أمطار الخير عالمناطق الشرقيه والشماليه في اماراتنا الحبيبه في عز الصيف
المهم.. (نخش) في الموضوع .. الناس اغلبهم مسافرين هالفتره, إلا اللي مرتبطين بدوام وماقدروا ياخذون اجازه أو عرس حد من هلهم
الحين أبا اعرف شو رايكم ؟ شو الأماكن اللي تفضلونها في الصيف وتعطونا نبذه بسيطه عنها
انا بقولكم شو اقتراحاتي ^_^ وان شاءالله ناوي اسافر هال20 يوم .. واللي بيخاوينا حيّاه

1-جزيرة بوكيت | تايلاند

الكل يمدحونها لما فيها من المناظر الخلابه والرائعه والنشاطات والمغامرات اللي فيها.. خاصة اذا طالعين شباب بدون عوايل
الأسعار رخيصه ومعقوله مقارنة بأوروبا

هذي بعض الصور

2- زيلامسي النمساوية

قرية صغيرة على ضفاف بحيرة تقع في منطقة كابرون في النمسا ضمن إقليم سالزبورج النمساوي.

تعتبر (زيلامسي) من أروع منتجعات العالم من حيث الطبيعة والهدوء، حيث يقصدها الكثير لقضاء فصل الصيف هناك ..
والجو رووووعه للتنزه في الحدائق أو التزلج على الجبال الثلجية

وهذي بعض الصور

3- جولد كوست الاستراليه

جولد كوست مصيف استراليا الأكثر شهره و قبلة السواح من شتي بقاع العالم
بل هي قبلة الأستراليين انفسهم وياتون لها من مختلف انحاء استراليا في عطلهم الرسميه

وهذي بعض الصور

وغيرهم من المدن الحلوه .. الواحد لازم يغيّر .. يعني العرب ماشاءالله وبالخصوص الخليجيين مكودين في لندن وباريس كل صيف

انا عن نفسي .. اذا سافرت مكان ماحب ارد اسير له مره ثانيه .. افضّل اني اشوف مدينه جديده وناس جداد واماكن جديده وثقافه جديده واكيد بتكون تجربه حلوه

عندكم طوكيو (اليابان) و سيؤول (كوريا الجنوبيه) وأنطاليا (تركيا) و فينيس الرائعه و روما (ايطاليا) برشلونه ومدريد (اسبانيا)

ومنكم نستفيد

السلام عليكم .. مساكم الله بالخير

شحالكم ربكم ابخير .. اعتذر عن الانقطاع الطويل عن الموقع وذلك لكثرة انشغالاتي في الفتره الأخيره .. واليوم حدثت الموقع بآخر الأرقام الموجوده وان شاءالله ربي يوفق الجميع

اليوم حاب اتكلم عن المواقع اللي 90% من مستخدمي النت يدخلونها وماظني في حد منكم مايعرفها

الفيسبوك www.Facebook.com

اليوتيوب www.youtube.com

تويتر www.twitter.com

واللي هي من أقوى المواقع في هالفتره

انا حاب اقولكم تجربتي مع هالمواقع وأخص بالذكر الفيسبوك والتويتر
ابا اعرف شو رايكم في اني اعرض ارقامي وأحط اعلانات في هالمواقع وطبعا هالشي مايكلفني واعتبره مجاناً .. هل تشوفون انها فكرة جيّده للتسويق ؟ يعني اذا وصلتك رساله خاصه في احد هالمواقع وفيها لستة ارقام او اعلان عن بزنس ثاني .. بيجذب انتباهك وبتقرا الاعلان ولا تحس انه كله خرط في خرط ؟
يهممممني رايكم يالربع ^_^ واللي عنده فكره يديده او مواقع فيها التسويق الأونلاين ياليت تفيدونا
ربي يحفظكم

حلاة العيد شوفتكم حلاته نلتقي معكم

عساكم دوم عواده وأسعد ناس بأعياده

نقدم لكم أسمى آيات التهاني والتبريكات بقدوم عيد الفطر السعيد أعاده الله علينا وعليكم و على الأمة الأسلامية بكل خير

وكل عام وانتوا بخير وعساكم من عواده ربي يحفظكم

اليوم أحب أناقش موضوع حسّاس جداً والكل يشتكي منه في الآونة الأخيرة، ألا وهو عودة الرادارات المتحركة إلينا بحلّتها الجديدة، لو تلاحظون في آخر سنتين تلاشت هالرادارات وماكانت موجوده، ولكن للأسف ردوا يحطونها وينشرونها في كل امارات الدولة وبشكل مكثّف ماشفناه من قبل. تتناقل الأخبار بين الشباب وتوصلنا تحذيرات سواء بالمسجات او اتصالات هاتفيه او عن طريق البلاك بيري مسنجر، عن وجود سيارة سوبارو في شارع مصفّح أو كامري في شارع المطار فيهن رادارات متحركة.
الصراحة شوارعنا ازدحمت وغصت بشتى أنواع وأشكال وأحجام من الرادارات!

وطبعاً أشكالهن تختلف، رادارات العاصمة تختلف عن رادارات دبي سواء في الشكل او المواصفات، وأيضاً تختلف عن اللي في الشارجة والامارات الاخرى، منها اللي على شكل صندوق والثاني مستطيل وهناك المتحرك اللي يصور الاتجاهين مرة في هذا الشارع ومرة في الشارع المقابل! ولاننسى الرادارات المتحركة والمخبئة بين الشجيرات او تحت الجسور او خلف الحواجز الاسمنتية !!
ونظراً لكثرة هذه المصائد، تفنّن المتفننون في تجنّبها وإيجاد حلول مختلفة للنيل منها. اكيد سمعتوا عن جهاز كاشف الرادار، وهو الجهاز اللي تركبه عندك في السيارة وينبّهك بوجود رادار قبل الوصول له بمسافة محددّة وأظني 100 متر. وطبعاً في أنواع من هالجهاز وكل جهاز له مواصفاته، ويوجد حل آخر اللي هو البخاخ، ايرشونه الشباب على رقم السيارة بحيث يوم يصوّرهم الرادار، تنعكس الصورة لنه هالبخاخ هو عباره عن مادة تعكس ضوء الفلاش وياتصيب ياتخيب! بس ترا كل هالأجهزة والبخاخات ممنوعة عندنا.
في النهاية، أنا أشوف انه لازم كل واحد يخصّص من معاشه الشهري عالأقل 800 درهم شهرياً لهالرادارات.. وحنا لـــنا الله T_T

كل عام وأنتم بألف ألف خير

أسعدكم الله بهذا الشهر، ووفّاكم فيه أجزل المثوبة والأجر
ووفّر حظكم من كل ما يرتفع من دعاء الداعين، وينزل من ثواب العاملين
وتقبل مساعيكم وزكّاها، ورفع درجاتكم وأعلاها
وبلغكم من الآمال منتهاها، وأظفركم بأبعدها وأقصاها

السلام عليكم ورحمة الله وبركاته

بلاك بيري وبلاك بيري، ماظني ان في حد هاليومين مايدري عن البلاك بيري او ماسمع عنه!
انفلونزا البلاك بيري اللي انتشرت بشكل كبير من بداية هذي السنه وتقريبا من شهر فبراير، ابا اعرف ليش توهم الناس دروا عنها مع ان اتصالات توفرها من سنتين او اكثر تقريباً. ولا لأنها صارت موضة البلاك بيري والكفرات والألوان والحركات فخذوه الناس كلهم ( حشرن مع الناس عيد ) D:

انا الصراحه أكثر شي شجّعني اشترك في هالخدمة أنا وغيري من ربعي، العرض التشجيعي من اتصالات واللي هو اشتراك مجاني للخدمه أول 3 شهور وكان العرض لفترة محدودة (A) .

المهم، الجهاز أكثر من رائع وفكرته حلوه وعالم البلاك بيري عالم كبير وواسع بس تراه سلاح ذو حدين..
واللي لفت انتباهي انه شفت كثير من الأطفال واللي اعمارهم ما تتجاوز 12 سنة تقريبا عندهم بلاك بيري. واظني ما يستخدمون شي غير البلاك بيري مسنجر واللي هو الغرض الأساسي من شرائهم لهالجهاز… ( نكت بايخه وإشاعات وكلام فاضي )

الواحد يفكر قبل مايطرّش ويسوي برودكاست، والصراحه في ناس جزاهم الله خير يطرشون أدعية وأحاديث وأمثال وحكم وأشياء غيرها يستفيدون منها الناس ولاباس بالنكت الحلوة وخفيفة الدم اللي مافيها طفاسة او استهزاء بالمشايخ والمطاوعه :@ >_<

الحين أبا أعرف شو رايكم.. شو تفضّلون الآي فون أو البلاك بيري ؟
واذا عندكم بلاك بيري، بولد ولا كيرف ولا ستورم؟

يلا اتريا تعليقاتكم ومشاركاتكم D:
وهذا البن كود مالي: 21E01558
اللي يبا يتواصل عالبلاك بيري مسنجر وتوصله آخر الأرقام وغيرها
بي سمارت, وخذلك بلاك بيري سمارت فون ^_*

ربي يحفظكم

بسم الله الرحمن الرحيم

أحب اعلن لكم عن افتتاح الموقع في هذا اليوم، وان شاءالله يحدِث هذا الموقع نقلة نوعية في عالم تجارة الأرقام، من حيث الطريقة والأسلوب الجديد في العرض.

واللي عنده أي ملاحظة أو إقتراح لايبخل علينا، وبالتوفيق للجميع ان شاءالله.

أخوكم/ حسين